Украинскиот претседател Володимир Зеленски денес изјави дека Украина во моментов чека на продолжување на мировните преговори со Русија, но дека целиот процес е дополнително забавен поради ескалацијата на конфликтите на Блискиот Исток, вклучително и војната меѓу Израел и Иран.
Во интервју за Блумберг, Зеленски рече дека Киев нема нови информации ниту од Москва ниту од Вашингтон за евентуално продолжување на преговорите што беа прекинати по претходната рунда во Женева, додека, како што изјави, американските претставници Стив Виткоф и Џаред Кушнер сè уште размислуваат за посета на Киев.
Тој оцени дека развојот на ситуацијата во иранскиот регион би можел да има директно влијание врз динамиката на мировните преговори меѓу Украина и Русија. Зеленски нагласи дека нема нови индикации за тоа кога или каде би можеле да се одржат разговорите организирани од администрацијата на американскиот претседател Доналд Трамп.