Украинскиот претседател Володимир Зеленски изјави дека продолжуваат борбите во Соледар, град во источна Украина за кој платеничката група Вагнер тврди дека го освоила и дека одбранбената линија во областа „се држи“.
„Терористичката држава и нејзините пропагандисти се обидуваат да се преправаат дека го освоиле Соледар, но борбите продолжуваат“, рече Зеленски во своето секојдневно обраќање.
„Правиме се за да ја зајакнеме одбраната на Украина без никаков прекин, ниту еден ден во источниот регион Доњецк, каде што се одржува одбранбената линија“, рече тој.
Генералштабот во Киев исто така објави дека борбите за Соледар продолжуваат. Руската армија сака да го стави под своја контрола целиот регион Доњецк со напад на Бахмут и прекинување на патиштата за снабдување на соседен Соледар, соопшти денеска украинската воена команда во Киев.
„Борбите продолжуваат“, се вели во соопштението. Претходно, портпаролот на источната група на украинската армија, Сергиј Черевати, ги негираше руските информации дека градот бил заземен.
Судбината на Соледар е неизвесна бидејќи за неа има спротивставени тврдења од украинската и руската страна.