Претседателот на Украина, Володимир Зеленски, изјави дека верува оти Русија успеала да влијае на луѓето во Белата куќа.
„Верувам дека Русија успеа да влијае на одредени луѓе во Белата куќа преку информации“, рече Зеленски во интервју за Тајм, објавено денеска.
Според неговото мислење, Русите им сигнализирале на Американците дека Украина не сака крај на војната и дека треба да се направи нешто за да се натераат Украинците на тоа.
Зеленски, потсетува Ројтерс, претходно го обвини Трамп дека е „заробен во рускиот балон за дезинформации“, забелешка што го налути американскиот претседател и неговите сојузници.
Володимир Зеленски денеска по повод Денот на Службата за безбедност на Украина (СБУ) изјави дека за време на војната специјалната служба станала еден од главните елементи на одбранбените и безбедносните сили.
„Денот на Службата за безбедност на Украина е ден на силни луѓе чии резултати се меѓу најважните за Украина. За време на војната, СБУ стана борбена разузнавачка служба, еден од главните елементи на одбранбените и безбедносните сили, која ја штити земјата од внатрешни закани и обезбедува важни резултати на фронтот и зад непријателските линии“, рече Зеленски.