Украинскиот претседател Володимир Зеленски изјави дека „не направил ништо лошо“ и дека не му должи извинување на американскиот претседател Доналд Трамп по тензичната средба во Овалната соба, на која присуствуваше и американскиот потпретседател Џеј-Ди Венс.
На прашањето дали му должи извинување на Трамп, Зеленски рече „не“ во интервју за Фокс њуз и додаде дека го почитува претседателот и американскиот народ.
„Мислам дека треба да бидеме многу отворени, искрени и не сум сигурен дека направивме нешто погрешно“, рече Зеленски.
Запрашан дали се согласува со оценката на сенаторот Крис Марфи дека средбата во Овалната соба со Трамп и Венс била „планирана заседа“ за да му се помогне на рускиот претседател Владимир Путин и да се „наштети на американската безбедност“, Зеленски рече дека тоа е „навистина тешка ситуација“.
„Не знам. Мислам дека не. Мислам дека тоа беше навистина тешка ситуација, бидејќи бевме многу отворени, многу директни“, рече украинскиот претседател.
Зеленски исто така истакна дека не сака да изгуби големи партнери во САД.
Запрашан дали жали за средбата, Зеленски рече: „Да, мислам дека не беше добро“.
Зеленски се заблагодари на двопартиската поддршка на Конгресот за помошта на Украина, а на прашањето на водителот дали верува дека покажал непочитување кон САД, тој одговори дека Украинците се „многу благодарни“ на Американците, како и на Трамп и Конгресот.
Тој додаде дека го третира Трамп со „сета почит“ и дека сака да стави крај на руско-украинската војна.
„Никој не сака да ја заврши војната повеќе од нас, бидејќи ние сме во Украина, ние сме во оваа војна, ние сме во оваа битка“, нагласи украинскиот лидер.