Украинскиот претседател Володимир Зеленски изјави дека му наложил на командантот на воздухопловните сили на вооружените сили на Украина да контактира со партнерите кои претходно ветија дека ќе испорачаат ракети за системите за воздушна одбрана „Патриот“, по масовниот руски напад со беспилотни летала и ракети.
„И важно е секое ветување за помош на Украина да се исполни на време. Постојат многу политички обврски на партнерите кои веќе се дадени, но сè уште не се спроведени. Вклучително и во форматот Рамштајн и на билатерална основа. Му наложив на командантот на воздухопловните сили да контактира со оние партнери кои претходно дадоа ветувања во врска со ракетите „Патриот“ и други системи. Чекам извештај за резултатите“, рече Зеленски во објава на Телеграм.
Зеленски додаде дека во текот на претходниот ден и ноќ, Русија извршила напад со околу 700 беспилотни летала, како и 19 балистички и неколку крстосувачки ракети, при што, како што истакна, повеќето од балистичките ракети биле насочени кон Киев.
Според Зеленски , украинската воздушна одбрана соборила 636 беспилотни летала и некои ракети, но биле регистрирани и удари, како и штети на станбени згради. Зеленски рече дека има смртни случаи во Одеса, Киев и Дњепарк, вклучувајќи и едно 12-годишно момче, додека околу 100 лица се повредени.
„Оваа ноќ докажува дека Русија не заслужува никакво омекнување на глобалната политика и укинување на санкциите“, нагласи Зеленски.
Зеленски повика на понатамошно зајакнување на притисокот и поддршката за Украина, особено во областа на воздушната одбрана.
„Русија се обложува на војна, и токму тоа треба да биде одговорот – ние мора да го заштитиме животот со сета наша сила и исто така мора да инсистираме на мир со сета наша сила“, рече украинскиот лидер.
Зеленски им се заблагодари на Германија, Норвешка и Италија за нивната поддршка и новите договори за зајакнување на воздушната одбрана на Украина, наведувајќи дека се работи на дополнителни испораки со Холандија.