Украинскиот претседател Володимир Зеленски денес изјави дека отклучувањето на европскиот пакет за поддршка од 90 милијарди евра за Украина ќе ја зајакне украинската војска и ќе им овозможи на властите да ги исполнат социјалните обврски кон Украинците.
„Денес е важен ден за нашата одбрана и за нашите односи со Европската Унија. Европскиот пакет за поддршка за Украина е отклучен – 90 милијарди евра за две години. Овој европски пакет ќе ја зајакне нашата војска, ќе ѝ обезбеди на Украина поголема стабилност и ќе ни овозможи да ги исполниме нашите социјални обврски кон Украинците како што е дефинирано со закон“, напиша тој на Телеграм.
Зеленски рече дека е важно Украина, по повеќе од четири години војна, целосно да си обезбеди таква финансиска сигурност.
Како што изјави, Украина работи на тоа првата транша од овој пакет за поддршка да биде достапна во мај-јуни.
