Здруженија на европски судии ја оспоруваат пред Европскиот суд одлуката за одобрување на полскиот план за закрепнување и отпорност.
Пристапот на Полска до грантови и заеми на ЕУ беше блокиран поради спорот околу независноста на судството во земјата.
Но Европската комисија во јуни го одобри полскиот план за закрепнување и отпорност, отворајќи го патот за Варшава да пристапи до финансиите.
Одлуката ја потврди и Советот на ЕУ за економски и финансиски прашања.
Четири европски судски асоцијации – Асоцијација на европски административни судии, Европска асоцијација на судии, Rechters voor Rechters и Европски судии за демократија и слобода ја оспоруваат одлуката пред Генералниот суд на ЕУ.
– Со ова барање се бара поништување на одлуката на Советот, се вели во соопштението, во кое се објаснува дека владеењето на правото во Полска „не го исполнува она што е неопходно за да се гарантира ефективна судска заштита и ги занемарува пресудите на Европскиот суд на правдата по ова прашање“.
Портпарол на полската Влада рече дека одлуката на Советот останува во сила и оти правните дејствија на судските здруженија се „неосновани“.
Полска во мај усвои закон за замена на контроверзниот судски дисциплински совет со ново тело, а ЕУ тогаш објави дека одлуката не ги опфаќа сите проблематични области и оти допрва треба да се направи официјална проценка.
Извор: МИА