Заменик гувернерката на Централната банка на Мјанмар, Тан Тан Шве, денеска е погодена со огнено оружје на прагот од нејзината куќа, а постојат спротивставени информации за тоа дали го преживеала нападот, објавија западни медиуми.
Тан Тан Шве била застрелана од двајца мажи откако ја отворила вратата од нејзиниот стан во Јангон, најголемиот град во земјата, потврди локален претставник.
Тој истакна дека вицегувернерката била пренесена во воена болница каде е констатирана нејзината смрт, но во извештајот на Радио Слободна Азија, поддржан од американската Влада, се наведува изјавата на воениот портпарол дека таа е хоспитализирана со сериозни повреди.
Засега не е познат идентитетот на вооружените напаѓачи, кои побегнале од местото на инцидентот.
Министерството за внатрешни работи во соопштение до медиумите потврди дека 55-годишната функционерка била нападната.
Тан Тан Шве е назначена за заменик гувернер неколку дена откако армијата во Мјанмар ја презеде власта на 1 февруари 2021 година.
Извор: МИА