Американскиот претседател Доналд Трамп ќе ја разгледа можноста за враќање на воената помош за Украина доколку се договорат мировните преговори и се преземат „мерки за градење доверба“, изјави денеска советникот за национална безбедност на Белата куќа, Мајк Волц.
„Мислам дека ако постигнеме напредок во мировните преговори и има мерки за градење доверба на маса, претседателот Трамп внимателно ќе размисли за продолжување на испораките“, рече Волц во интервју за Фокс њуз.
Претходно, за време на неговото обраќање пред американскиот Конгрес, Трамп рече дека украинскиот претседател Володимир Зеленски му испратил писмо во кое изразува подготвеност да преговара за мир и да потпише договор за минерали.