НАТО следната недела ќе одржи планирана годишна воена вежба со нуклеарно оружје и покрај зголемените тензии поради војната во Украина и заканите на рускиот претседател Владимир Путин дека ќе ги искористи сите расположливи средства за одбрана на руската територија, изјави денеска генералниот секретар на НАТО, Јенс Столтенберг.
Вежбата наречена „Steadfast Noon“ се одржува секоја година и обично трае околу една недела. Таа предвидува распоредување на борбени авиони способни да носат нуклеарни боеви глави, но не и употреба на вистински бомби. Во вежбата учествуваат и други воздухопловни сили.
Четиринаесет од 30-те земји-членки на НАТО ќе бидат вклучени во вежбата, планирана пред рускиот напад врз Украина во февруари. Главниот дел од маневрот ќе биде на повеќе од 1.000 километри од Русија, изјави претставник на НАТО.
„Тоа би испратило многу погрешен сигнал ако одеднаш ја откажеме рутинската, долго планирана вежба сега поради војната во Украина. Тоа би бил апсолутно погрешен сигнал“, изјави Столтенберг за новинарите пред состанокот на министрите за одбрана на НАТО во Брисел.