Шпанските власти конфискуваа 127 килограми кокаин, што билe сокриени во школски едреник на шпанската Воена морнарица.
Кокаинот бил откриен при претрес во повеќе тешко достапни места на бродот (меѓу резервните едра), до кои малкумина морнари имале пристап, се прецизира во соопштението на шпанската Цивилна гарда.
Меѓу морнарите имало двајца Шпанци, кои на 12 јули беа уапсени заедно со еден Еквадорец, непосредно пред пристигнувањето на бродот во пристаништето Марин, во североисточната шпанска област Галиција, по шестмесечна обука во морето.
Приведените се спроведени во воениот затвор во Мадрид и се обвинети за „шверц на наркотици и пркршување на законот од страна на воен обврзник“.
Тројцата морнари го искористиле неколкудневниот престој во Колумбија за да стапат во контакт со локални нарко шверцери, кои за парична награда им го довериле кокаинот да го пренесат во Њујорк.
Кокаинот бил сокриен во нивната облека, што им овозможило да го натоварат на бродот и потоа да го растоварат и да им го дадат на други колумбиски шверцери на наркотици. Шверцерите биле уапсени во средината на мај со 20 килограми кокаин кај себе, по заминувањето на шпанскиот брод од Њујорк.
Едреникот „Хуан Себастијан де Елкано“ е со должина од 113 метри и може да прими приближно 200 морнари. Тој е во експлоатација од 1928 година и на него се обучуваат идните шпански военопоморски офицери, меѓу кои биле и актуелниот крал Фелипе Шестти и неговиот татко Хуан Карлос.