Жителите на шпанската покраина Каталонија утре одат на предвремени избори, а од резултатите зависи и прашањето за продолжување на борбата за осамостојување и стекнување независност.
Повеќе од 5,2 милиони каталонски избирачи со утрешното гласање бираат за политичката иднина како за Каталонија така и за Шпанија.
Политички аналитичари најавуваат победа на политичките партии кои заговараат независност на Каталонија и кои најавуваат одржување референдум за независност.
Премиерот на Каталонија, Артур Мас ги повика гласачите да год адат гласот за каталонската националистичка партија CIU која моментно е најсилна политичка опција во покраината, и најави почеток на процес за осамостојување во јануари идната година.
Владата во Мадрид најави тужби до Уставниот суд на Шпанија, додека Каталонците се закануваат дека ќе се обратат до меѓународни правни институции.
Со население од 7,5 милиони жители, економија вредна 200 милијарди евра, сопствена полиција, Каталонија е поголема од Белгија и побогата отколку Португалија и Андора заедно.