Ширењето на колерата во Јемен е „неконтролирано“ и може дополнително да се влоши со пристигнување на сезоната на дождови, иако стапката на новите случаи на заболени на некои места е намалена, соопшти денеска Светската здравствена организација.
Меѓународната хуманитарна организација „Оксфам“ пресметала дека бројот би можел да достигне до 600.000 случаи, што е „најголем број било кога регистриран во било која држава за само една година откако е започната евиденција“, надминувајќи ги Хаити од 2011 година.
Портпаролката на СЗО, Фадела Шаиб истакна дека се регистрирани над 1.800 смртни случаи од колера во Јемен од почетокот на епидемијата, која се појави кон крајот на април.
– Од 27 април до 19 јули регистрирани се 368.207 случаи на колера од кои 1.828 луѓе починале, додаде Шаиб.
Таа нагласи дека колера има во 21 од 23 јеменски провинции, а стапката на смртност е пет проценти.