Во израелски напад врз куќа во населбата Дарај во градот Газа, загинаа 29 лица, а десетици луѓе се ранети, јавува палестинската агенција ВАФА.
На видеото по нападот што го објави Ал Џезира, може да се види како спасувачките тимови ги вадат телата на загинатите од бомбардираната зграда.
Во други делови на градот Газа, израелски хеликоптери нападнаа неколку куќи во населбите Зејтун, Шуџаја и Ремал, а во овие напади беа повредени десетици цивили.
Денеска израелските сили го нападнаа бегалскиот камп Ал Нусејрат во центарот на Газа, во кој беа ранети најмалку 70 лица, но не се знае дали има жртви.
Ал Џезира објави дека во нападот се ранети двајца новинари на оваа агенција, како и одреден број новинари на турскиот јавен сервис ТРТ на арапски јазик. Катарската агенција додава дека имало силен напад на северниот дел на кампот, кој бил погоден од артилериски гранати и од воздух.