Најмалку 22 работници мигранти загинаа, а 24 се повредени, кога камион натоварен со чакал, со неисправни сопирачки, се судри со автобус во Обединетите Арапски Емирати, соопшти полицијата.
Несреќата се случила во близина на местото Ал Аин, околу 150 километри источно од Абу Даби, каде, според шефот на локалната полиција, камионот, откако му се расипале сопирачките, изгубил контрола и удрил во автобус.
Националноста на загинатите работници мигранти не е објавена, но, како што наведува агенцијата АП, во Обединетите Арапски Емирати, присутен е огромен број на работници од јужноазиските земји и други држави од персискиот Залив.
Работниците обично патуваат со автобуси од камповите каде што се сместени до работните места.