Во Шпанија се уапсени 51 ице во рамки на голема антикорупциска акција за криминал со реализација на тендери на општинско и регионално ниво во вкупна вредност од приближно 250 милиони евра, пренесоа француските медиуми.
Во аферата се вклучени општински советници и чиновници од владеачката конзервативна Народна партија, како и на опозициската Социјалистичка партија, но, исто така, и повеќе менаџери на фирми.
Двете партии соопштија дека го замрзнуваат членството на осомничените во нивните редови.
Корупциската мрежа опфаќала серија општини и автономни области, вклучувајќи ги и Мадрид, Мурсија, Валенсија и Леон, се наведува во соопштението на одделот за борба со корупцијата на шпанското обвинителство.
Истрагата се водела уште од јуни под сомненија за серија кривични дела, вклучувајќи и перење пари, корупција и злоупотреба на службена положба.
Меѓу приведените е и вториот човек на регионалната конзервативна Влада на Мадрид, Франсиско Гранадос, кој бил и генерален секретар на владеачката Народна партија во областа.