Во Унгарија денеска влегоа во сила построгите правила за барање азил, што Владата ги воведе уште минатиот месец со цел да го запре дотокот на мигранти, пренесе ДПА.
Новите правила предвидуваат рокот за обработка на барањата за азил да се намали на 15 дена, што го забрзува протерувањето на луѓето чие барање за останување во земјата е отфрлено.
Според организациите за заштита на правата на луѓето, овие мерки ќе го нарушат правото на многу луѓе кои бараат азил.
Од почетокот на годината во Унгарија пристигнале околу 100.000 мигранти, главно од Сирија. Повеќето од нив оваа земја ја користат како влезна врата за Западна Европа.
Унгарската Влада, исто така, почна да гради 175-километарска ограда на границата со Србија, за да ги запре мигрантите од Азија, Африка и Балканот.