Рускиот претседател Владимир Путин го потврди учеството на самитот меѓу Европската унија и неколку азиски земји на 16 и 17 октомври во Милано, соопшти вчера извор близок до италијанската Влада.
Тоа е прва можност рускиот претседател да се сретне со европските лидери по неговата посета на Франција во јуни годинава.
Првично, Русија планираше во Милано да го испрати премиерот Дмитриј Медведев, но ја промени својата одлука.
Самитот со економски фокус се одржува на секои две години во Европа и Азија. Овогодинешниот самит ќе се одржи во Милано. Меѓу учесниците се очекува да бидат германскиот канцелар Ангела Меркел, британскиот премиер Дејвид Камерон и францускиот претседател Франсоа Оланд.