Стотици луѓе се евакуирани од своите домови во департманот Уд во јужна Франција, каде што рекорден пожар се шири трет ден, соопштија локалните власти.
Шеесет и петгодишна жена загина во пожарот, додека три лица се водат како исчезнати, а вкупно 13 лица се повредени, вклучувајќи двајца цивили и единаесет пожарникари.
Привремени центри за сместување беа отворени во 17 општини во ноќта помеѓу среда и четврток, со капацитет за 1.759 лица, додека противпожарните и спасувачките служби се на терен со полна сила, објави денес BFM TV.
На врвот на пожарот беа распоредени 2.100 пожарникари со 500 возила, а вкупно 130 водни млазници беа испуштени од воздух.
Властите забележуваат дека евакуациите се стандардна мерка за заштита на населението во вакви ситуации.
Иако интензитетот на пожарот делумно се намали, неговото ширење продолжува, а за денес е планирано понатамошно интензивирање на операциите за гаснење.
За време на обиколката на погоденото подрачје, премиерот Франсоа Бајру предупреди дека ова е „настан директно поврзан со климатските промени и сушата“, нагласувајќи дека станува збор за „невидена“ катастрофа.
Според официјалните податоци, ова е најсериозниот шумски пожар во Франција од 2006 година, кога започна систематското евидентирање на вакви инциденти, и најтешкиот за медитеранскиот дел од земјата од 1970-тите.