Протестите против регрутирањето на ултраортодоксните Евреи во израелската армија вчера станаа насилни. Демонстрантите ги нападнаа полицајците, но и автомобил на министер, соопшти локалната полиција. Демонстрантите фрлаа камења врз полицајците и автомобилот на министерот Јицак Голдкнопф, кој се враќаше во својот дом. Запалија и корпи за отпадоци и го блокираа автопатот.
Портпаролот на Голдкнопф потврди за Си-Ен-Ен дека полицијата го евакуирала министерот неколку минути по нападот и дека тој не е повреден. Голдкнопф е министер за домување и градежништво и лидер на еврејската партија Обединета Тора.
Now in Jerusalem: Ultra orthodox protesters attack the car of Minster Yitzchak Goldknopf during a mass demonstration against enlistment to the Israeli army pic.twitter.com/VJfUBcrA3u
— Oren Ziv (@OrenZiv_) June 30, 2024
На видеата на социјалните мрежи се гледа како демонстрантите го опкружуваат автомобилот на министерот и удираат по прозорците. Ултраортодоксните Евреи протестираа на улиците на Ерусалим откако израелскиот Врховен суд во вторникот донесе одлука со која и нареди на владата да регрутира ултраортодоксни Евреи во армијата.
Од основањето на Израел, ултраортодоксните Евреи се ослободени од задолжителна воена служба.
Полицијата соопшти дека морала да употреби сила вчера за да ги растера демонстрантите откако тие ги игнорирале наредбите да си заминат. Уапсени се пет лица, од кои две за напад врз полицајци, а три за фрлање камења или други предмети, се вели во полициското соопштение.