Уништен е руски брод во окупираниот пристанишен град Бердјанск, соопштија украинските власти. Украинската армија ја објави снимката рано утринава. Деталите за тоа што ја предизвикало експлозијата и пожарот на бродот не се јасни.
Според заменик-министерот за одбрана Хана Малијар, украинската армија погодила огромна цел, способна да носи 20 тенкови, 45 оклопни возила и 400 војници.
Бердјанск, кој се наоѓа западно од опколеното пристаниште Мариупол, беше окупиран четири дена откако Русија ја нападна Украина. Русија вели дека го користела пристаништето како база за транспорт на опрема за своите војници.
Бердјанск е од голема стратешка вредност за Русите, лоциран помеѓу Крим и Мариупол, на околу 80 километри источно, каде што се проценува дека околу 100.000 луѓе остануваат изложени на руско бомбардирање.