Украинските власти објавија ново гранатирање рано утринава и покрај едностраниот прекин на огнот објавен од рускиот претседател Владимир Путин, кој наводно стапил на сила на полноќ.
Руски авиони постојано фрлаа наведувани бомби над северниот регион Суми, соопштија украинските воздухопловни сили на Телеграма, предупредувајќи на континуирана воздушна активност во источниот правец. Во меѓувреме, рано утринава биле пријавени напади со беспилотни летала и предупредувања во областа Липецк во западна Русија, изјави регионалниот гувернер Игор Артамонов.
Информациите обезбедени од двете страни не можеа да бидат независно проверени.
Едностраниот 72-часовен прекин на огнот прогласен од Москва стапи на сила веднаш по полноќ, јави руската државна новинска агенција ТАСС. Путин го објави прекинот на огнот во времето на руската годишна прослава на Денот на победата на 9 мај, што го означува крајот на Втората светска војна во Европа.
Украина го отфрли потегот како симболичен и, заедно со Соединетите држави, продолжува да повикува на прекин на огнот што ќе трае најмалку 30 дена. „Нашиот предлог за прекин на нападите, за прекин на огнот од најмалку 30 дена, сè уште стои“, рече украинскиот претседател Володимир Зеленски во видео обраќање до нацијата вчеравечер.
„Но, светот гледа дека Русија не дава никаков одговор – нема одговор освен нови напади“, додаде тој.
Украина се брани од целосна руска инвазија повеќе од три години.