Интензивните борби меѓу Украина и Русија се водат речиси три години, но конфликтот започна многу порано. Во март 2014 година, Русија го анектира полуостровот Крим, кој и припаѓа на Украина, и ги поддржа проруските сепаратисти во вооружениот бунт против украинските сили на истокот на земјата. Во февруари 2022 година, Русија започна голема инвазија и се обиде да го заземе Киев.
Денес, таа контролира околу една петтина од украинската територија, главно на истокот и југот на земјата. Двете страни претрпеа големи загуби, најмногу во редовите на војниците. Украина, исто така, започна напади врз делови од Русија, особено во областа Курск на североисток, делумно за да ја принуди Москва да ги прегрупира своите сили и да го намали притисокот врз украинските војници на бојното поле на исток.
Американскиот претседател Донал Трамп кој синоќа објави итен почеток на преговори за крај на војната, пред новинарите рече дека е веројатно Украина да не го врати целиот регион кој во моментов не е под нејзина котрола.