Северна Кореја вчера се обиде да лансира нов воен извидувачки сателит, но обидот не успеа, а потегот беше осуден од Јужна Кореја, Јапонија и САД.
Јужна Кореја објави видео за кое нејзината војска тврди дека го покажува неуспешниот обид за лансирање. Едноминутното црно-бело видео објавено од воениот штаб на Јужна Кореја покажува нешто што изгледа како експлозија на небото проследено со блесоци. Видеото е снимено со уред за надзор на јужнокорејски патролен брод.
Северна Кореја соопшти дека нејзиниот последен обид да лансира нов воен извидувачки сателит не успеал во понеделникот при лет. Првичните анализи покажаа дека причината е ново развиен ракетен мотор на течно гориво, но се истражуваат други можни причини, објави севернокорејскиот државен медиум KCNA.
Обидот дојде само неколку часа откако Пјонгјанг издаде предупредување дека ќе се обиде да лансира сателит до 4 јуни, кој ќе биде негов втор шпионски сателит во орбитата.
Јужнокорејските и американските власти веруваат дека ракетата експлодирала откако летала неколку минути, а воениот штаб на Јужна Кореја соопшти дека открила голема количина ракетни остатоци во морето само две минути по лансирањето.
Предметот испукан од Северна Кореја исчезна над Жолтото Море, изјави за новинарите шефот на јапонскиот кабинет Јошимаса Хајаши. Тој ја обвини Северна Кореја дека со лансирањето ги прекршила резолуциите на Советот за безбедност на ОН.
Соединетите Држави го осудија лансирањето, „кое вклучуваше технологии директно поврзани со програмата за балистички ракети на КНДР и се случи спротивно на повеќе резолуции на Советот за безбедност на ОН“, рече портпаролот на Стејт департментот. Патем, КНДР е кратенка за Демократска Народна Република Кореја.
Лансирањето дојде неколку часа откако Кина, Јужна Кореја и Јапонија го заклучија трипартитниот самит во Сеул, забележува Ројтерс.