Главната уредничка на телевизијата „Русија Денес“, Маргарита Симоњанова на интернет објави снимка од аеродромот каде беше отруен рускиот опозициски политичар и активист Алексеј Навални.
На видеото може да се забележи дека чашата од која пиеше Навални му ја носи негов помошник и соработник.
„На камерите од аеродромот се гледа како Навални седи на стол без пијалок. Подоцна, чашата му ја носи Илја Пахомов, вработен во Фондацијата за антикорупција и помошник на Навални. Тоа значи дека никој не можел да знае за кого се прави пијалакот“, заклучува Симоњанова.
Рускиот опозициски лидер и блогер Алексеј Навални беше хоспитализиран во Омск откако се напи од чашата на аеродромот и тој е во кома, во критична состојба. Навални, кој е еден од најголемите критичари на рускиот претседател Владимир Путин,е во бесознание и е поврзан на апарат за вештачко дишење, изјави неговата портпаролка Кира Јармиш.