Најмалку 20 лица загинаа, меѓу кои три деца, а речиси 1.000 лица се уапсени, меѓу кои и 40 малолетници, во протестите во Иран, соопштија денес меѓународните организации за човекови права, обвинувајќи ги безбедносните сили на земјата за „неселективно таргетирање на цивили“.
Street protests in Iran 🇮🇷 are getting serious, triggered by collapse of the currency and inflation, but also with political slogans in the traditionally important bazaar of Teheran. pic.twitter.com/eWY0yWMHwP
— Carl Bildt (@carlbildt) January 2, 2026
Протестите продолжија во текот на викендот, и покрај засилените безбедносни мерки по изјавите на врховниот лидер на Иран, ајатолахот Али Хамнеи, кој ги нарече демонстрантите „бунтовници“.
Активистите за човекови права со седиште во САД (HRAI) соопштија дека досега се уапсени 990 лица, додека најмалку 20 лица ги загубиле животите, објави Гардијан.
Меѓу убиените малолетници е и 15-годишниот Мустафа Фалахи од централен Иран, според изворите.
Организацијата Хенгав со седиште во Осло објави дека Фалахи е убиен на 1 јануари за време на безбедносна акција.
Хенгав, исто така, објави дека 17-годишниот Расул Кадивариан и неговиот 20-годишен брат Реза се убиени на 3 јануари во градот Керманшах.
Заменик-директорката на HRAI, Скајлар Томпсон, изјави дека организацијата ги документирала овие смртни случаи, како и апсењата на најмалку 44 деца, нагласувајќи дека присуството на млади луѓе на протестите бара посебна заштита во согласност со меѓународното право.
Сведоци на терен известија дека во текот на викендот во некои делови од западен Иран, демонстрантите извикувале слогани против владата и барале ослободување на уапсените демонстранти, по што интервенирале безбедносните сили.
Организациите за човекови права, исто така, известија во текот на викендот дека безбедносните сили интервенирале во болниците каде што биле однесени повредени демонстранти.
Според Hengaw, безбедносните сили употребиле сила за да ги растераат протестите без да прават разлика помеѓу возрасни и малолетници, додека притворените наводно се подложени на суров третман пред да бидат префрлени на непознати локации.
Според HRAI, протестите избувнале поради падот на националната валута и зголемувањето на трошоците за живот, и се прошириле во најмалку 78 градови и 222 локации, а демонстрантите бараат крај на сегашниот режим.
Протестите започнале меѓу трговците и дуќанџиите поради економските тешкотии, пред да се прошират на универзитетските студенти и демонстрантите во провинциите.
Демонстрантите скандираа против иранската влада, а економските проблеми, како што е инфлацијата што надминува 36 проценти, дополнително ја влошија ситуацијата.
Иранската валута, ријалот, изгуби речиси половина од својата вредност во однос на доларот, предизвикувајќи тешкотии за многу граѓани.
Како одговор на немирите, иранските власти се обидоа со двостран пристап, признавајќи ја економската криза, но користејќи насилство против понасилните форми на протест.
Во текот на викендот, врховниот лидер на Иран, ајатолахот Али Хамнеи, изјави дека властите ќе „разговараат со демонстрантите“, но дека „бунтовниците треба да бидат ставени на нивно место“.