Северна Кореја покажа нови беспилотни летала, нуклеарни ракети и балистички ракети на големата воена парада во главниот град Пјонгјанг, во присуство на лидерот Ким Џонг-ун и делегации од Русија и Кина, објавија државните медиуми.
Со воена парада во четвртокот вечерта беше одбележана 70-годишнината од крајот на Корејската војна, која се слави како „Ден на победата“ на северот на Корејскиот полуостров.
Првпат од избувнувањето на пандемијата „Ковид-19“, воената парада имаше посетители од странство, поточно делегации од Кина и Русија, меѓу кои и рускиот министер за одбрана Сергеј Шојгу.
Нивното појавување на настан фокусиран на нуклеарни ракети (забранети од Советот за безбедност на ОН, со гласовите на Кина и Русија) претставува промена од претходните години кога Пекинг и Москва се обидоа да се дистанцираат од развојот на нуклеарната програма на Северна Кореја.
На парадата можеа да се видат најновите интерконтинентални балистички ракети Хвасонг-17 и Хвасонг-18, чиј дострел е доволен за погодување на која било цел во САД, како што јави државната новинска агенција. Дел од програмата беше и прелетување на шпионски авиони.
Министерот за одбрана, генерал Канг Сун Нам, во својот говор ги обвини САД и нивните сојузници за подигање на тензиите во регионот.
Кин Џонг-ун го угости рускиот министер за одбрана на свечен ручек за време на кој му вети солидарност со рускиот народ и руската армија. Од друга страна, Шојга ја пофали севернокорејската армија, нарекувајќи ја најсилната армија во светот, а потоа разговараа за безбедносната и одбранбената соработка меѓу двете земји, јави државната новинска агенција.
Во својот одговор до Пјонгјанг, Вашингтон го повика за снабдување на Русија со оружје, кое потоа го користи за воени цели во Украина. Заменик портпаролот на американскиот Стејт департмент Ведант Пател изјави дека САД се крајно загрижени поради растечките врски меѓу Москва и Пјонгјанг.
Пјонгјанг и Москва негираат дека извршиле какви било трансакции со оружје.
Сепак, присуството на Кина и Русија на парадата за вооружување на која гласаа ОН предизвикува сомнеж за подготвеноста на тие земји да спроведат санкции, рече Леиф-Ерик Исли, професор по меѓународна политика на Националниот универзитет во Сеул.
Русија и Кина се спротивставија на барањата на САД за воведување дополнителни санкции кон Северна Кореја поради продолжување на развојот на оружје, сметајќи дека е неопходно да се олеснат санкциите за да не се доведе Пјонгјанг на преговарачка маса, но и од хуманитарни причини.
„Не помага кога две постојани членки на Советот за безбедност на ОН отворено го поддржуваат севернокорејскиот режим кој ги крши човековите права и ги игнорира резолуциите со кои се забранува неговиот нуклеарен развој“, рече Исли.
Портпаролот на ОН Стефан Дујарик забележува дека „сите членки на Советот за безбедност, како и сите членки на ОН заедно, имаат одговорност да ги поддржат и да се придржуваат до сите резолуции на Советот за безбедност“.