Примирјето постигнато со посредство на американскиот претседател Доналд Трамп меѓу Иран и Израел се чини дека се почитува денеска, еден ден откако двете земји сигнализираа дека нивната воздушна војна е завршена, барем засега.
Двете страни прогласија победа вчера по 12 дена војна, во кои САД се придружија на воздушните напади на страната на Израел за уништување на иранските постројки за збогатување ураниум. Пратеникот на Трамп за Блискиот Исток, Стив Виткоф, доцна синоќа изјави дека разговорите меѓу САД и Иран се „ветувачки“ и дека Вашингтон се надева на долгорочен мировен договор.
„Веќе разговараме едни со други, не само директно, туку и преку посредници. Мислам дека разговорите се ветувачки. Се надевам дека можеме да имаме долгорочен мировен договор што ќе го воскресне Иран“, рече Виткоф во интервју за Фокс њуз.
„Сега е од нас да седнеме со Иранците и да постигнеме сеопфатен мировен договор, и уверен сум дека ќе го постигнеме тоа“, додаде тој.
Трамп изјави за време на викендот дека американските бомбардери „ја уништија“ програмата за развој на нуклеарно оружје на Иран. Иран тврди дека неговите активности за збогатување ураниум се само за цивилни цели.
Но, тврдењето на Трамп се чини дека е во спротивност со првичниот извештај од една од разузнавачките агенции на неговата администрација, според три лица запознаени со ова прашање.
Еден од изворите рече дека резервите на збогатен ураниум на Иран не се елиминирани и дека нуклеарната програма на Иран, од која поголемиот дел е закопана длабоко под земја, можеби е вратена само еден или два месеци назад.
Израелскиот премиер Бенјамин Нетанјаху вчера изјави дека нападот ја отстранил нуклеарната закана за Израел и дека е решен да спречи секаков обид на Техеран да ја оживее својата програма за оружје.
„Отстранивме две непосредни егзистенцијални закани: заканата од нуклеарно уништување и заканата од уништување со 20.000 балистички ракети“, рече тој.
Иранскиот претседател Масуд Пезешкијан рече дека неговата земја успешно ја завршила војната во она што го нарече „голема победа“, според иранските медиуми.
Пезешкијан му рекол и на саудискиот престолонаследник Мохамед бин Салман дека Техеран е подготвен да ги реши разликите со САД, според официјалната новинска агенција ИРНА.