Руските воздушни напади врз североисточниот украински град Суми „драстично се интензивираа“ во изминатите два месеци, изјави за АФП Олег Стрилка, портпарол на украинската служба за итни случаи.
Од неговиот локал во центарот на градот, Роман Витковски рече дека атмосферата меѓу неговите пријатели и клиенти нагло се променила: „Има луѓе кои не си заминаа за време на целата војна, кои шетаа по овие улици во центарот на градот со своите деца. Сега се пакуваат“.
Витковски планира да остане: „Притисокот се зголемува. Но, ако тие напреднаа 50 километри во Донбас за три години, а ние сме на 35 километри од границата, ми се чини дека имаме уште време“.
Претседателот Володимир Зеленски предупреди дека Русија подготвува нова офанзива против регионот Суми. Градот Суми е на само 30 километри од руската граница и беше појдовна точка за украинскиот напад врз руската област Курск минатото лето.
Оттогаш, Москва ги потисна украинските сили од речиси целата област и продолжи да напредува. Руската армија тврди дека зазела неколку погранични села, што Киев го негира. Според анализата на АФП врз основа на податоците од Институтот за проучување на војната, Русија сега контролира околу 95 квадратни километри од регионот Суми, додека на почетокот на годината таа бројка беше занемарлива.
Пред една недела, градот Суми беше цел на еден од најсмртоносните руски напади оваа година. Руските сили истрелаа балистички ракети, вклучително и оние со касетни бомби, во центарот на градот, при што според официјалните украински податоци загинаа 35 цивили. Нападот наиде на силна осуда од Киев и дополнително ги засили стравувањата од нова руска офанзива на тој дел од фронтот.