Русија и САД наскоро би можеле да одржат нова рунда разговори, бидејќи Вашингтон постепено се оддалечува од директното вклучување во иранската криза, изјави политикологот и раководител на агенцијата „Дубравски консалтинг“, Павел Дубравски.
Според него, администрацијата на американскиот претседател Доналд Трамп продолжува со својата политика на истовремени контакти со Москва и Киев, што укажува на можност за нови дипломатски потези во наредниот период.
„Ако ја погледнеме логиката на претходните контакти, гледаме дека Трамп разговара со двете страни истовремено. Затоа, ако имало разговори со рускиот претседател Владимир Путин, сега разговорот се води и со Зеленски, на маргините на самитот на Г7“, рече Дубравски.
Тој оцени дека таков пристап би можел да означи продолжување на обидот на САД да одржуваат канали за комуникација со сите клучни актери, без оглед на длабоките разлики во ставовите на Москва и Киев.
Рускиот претседателски помошник за меѓународни прашања, Јуриј Ушаков, пред четири дена изјави дека претставниците на американскиот претседател Доналд Трамп, Стив Виткоф и Џаред Кушнер, би можеле наскоро да ја посетат Русија. Истиот ден, Владимир Путин разговараше по телефон со Доналд Трамп.