Украинскиот министер за надворешни работи Андриј Сибиха денес изјави дека рускиот претседател Владимир Путин втор ден по ред дава изјави што ја покажуваат неговата „неподготвеност да ја прекине војната во Украина“.
– Вчера тој рече дека е подготвен да се бори цела зима. Денес се заканува на морските пристаништа и слободата на пловидба. А овие закани се првенствено насочени кон Одеса, за која претседателот (на Соединетите Американски Држави) Доналд Трамп зборуваше со голема топлина, напиша Сибиха на својот профил X.
Сибиха нагласи дека Русија мора да „го запре крвопролевањето“ што го започна, додавајќи дека ако тоа не се случи, тоа значи дека Путин „повторно плука во лицето на светот“, што не треба да остане без последици.
Тој рече дека Украина целосно ги поддржува „сите праведни напори што можат да донесат праведен мир“, додавајќи дека украинските и американските тимови, заедно со европските партнери, завршиле одлична работа и постигнале важен напредок.
„Сега е време да се принуди изворот на војната во Москва да го запре конфликтот“, напиша Сибиха.
Путин претходно денес изјави дека Русија ќе ги засили нападите врз украинските пристаништа и сите бродови што влегуваат во нив како одговор на нападите врз руските танкери, објави Танјуг. Тој додаде дека Русија би можела да ја „отсече Украина од морето“ ако Киев продолжи со пиратството врз руските бродови.