Украинскиот министер за надворешни работи Андриј Сибиха изјави дека по рускиот напад во Киев е пронајдена компонента од дрон произведен во Кина и дека е оштетен кинескиот генерален конзулат во Одеса.
Украинскиот министер за надворешни работи го опиша ова на X-платформата како „иронија“, пренесува Укринформ.
„Каква иронија. По денешниот масовен руски воздушен напад врз Украина, во Киев откривме компонента од руско-ирански борбен дрон Шахед-136/Геран-2, кој е произведен во Кина и неодамна е испорачан. Истата ноќ, кинескиот генерален конзулат во Одеса претрпе помала штета како резултат на руските напади врз градот. Нема подобра метафора за тоа како Путин продолжува да ја ескалира својата војна и терор, привлекувајќи други, вклучувајќи севернокорејски војници, иранско оружје и некои кинески производители“, нагласи Сибиха.
Според него, постои неразделна врска помеѓу безбедноста во Европа, Блискиот Исток и Индо-пацифичкиот регион.
Украинскиот министер за надворешни работи, исто така, ги повика САД да го зголемат притисокот врз Русија.