Украина соопшти дека нејзините сили ги заробиле руските војници во разурнатиот источен град Бахмут, каде што Украинците напредуваат како дел од нивната контраофанзива. Руските извештаи за борбите велат дека силите на Москва го одбиле или го спречиле напредокот на Украина на исток и југ.
Повеќе од 500 дена од почетокот на руската инвазија, украинската контраофанзива која започна на почетокот на минатиот месец се фокусираше на заземање групи села на југоистокот и на нападите на руските сили кои го држат Бахмут. Украинските власти вчера изјавија дека постигнале напредок во двата сектора.
„Бахмут. Непријателот е фатен во стапица“, рече генералот Олександер Сирскиј, додавајќи дека непријателите се протерани од нивните позиции. На југ, генералот Олександер Транавски изјави дека украинските сили се во движење и дека Русите изгубиле стотици луѓе во текот на 24 часа.
Претседателот Володимир Зеленски рече дека контраофанзивата, засилена со софистицирано оружје од Запад, напредува побавно отколку што се надеваше Украина. Воените аналитичари велат дека Киев сака да им покаже барем одреден успех на лидерите кои присуствуваат на самитот на НАТО во Литванија што почнува денеска.
Руското Министерство за одбрана објави дека нејзините сили ги одбиле украинските напади во три области на регионот Доњецк, вклучувајќи го и селото Клишчивка, кое беше во центарот на борбите во последните денови во близина на Бахмут. Министерството додаде дека руските војници ги одбиле украинските напади на југот, вклучително и околу селото Ривнопил, за кое украинската страна соопшти дека го освоила пред две недели.
Украинската заменик-министерка за одбрана Хана Маљар изјави дека во текот на изминатата недела, силите на Киев вратиле под своја контрола 10,2 квадратни километри на југ и четири квадратни километри територија на исток.
Украинската војска соопшти дека нејзините војници повторно зазеле 169 квадратни километри на јужниот фронт и 24 квадратни километри околу Бахмут од почетокот на контраофанзивата. Ројтерс не можеше да ги потврди извештаите од фронтот, а Русија не ги призна украинските придобивки.
Москва тврди дека борбите се жестоки од почетокот на контраофанзивата. Нејзините сили сè уште држат големи делови од територијата во источна и јужна Украина што ги зазедоа по инвазијата. Украина забележа нови руски напади врз цивилни локации.
Нејзините служби за итни случаи соопштија дека седум лица загинале во напад на пункт за дистрибуција на хуманитарна помош на југоисток, а две лица загинале во руско гранатирање на исток. Русија негира дека нападнала цивилни области.