Украинските сили тврдат дека убиле повеќе од илјада руски војници во изминатите неколку дена, додека битката за Бахмут продолжува, објави „Гардијан“.
Во вечерното обраќање во неделата вечерта, украинскиот претседател Володимир Зеленски рече дека повеќе од 1.000 руски војници биле убиени, а 1.500 ранети во борбите.
„За помалку од една недела, почнувајќи од 6 март, успеавме да убиеме повеќе од 1.100 непријателски војници само во секторот Бахмут, што е голема загуба за Русија, токму на тоа место кај Бахмут“, рече Зеленски.
Украина стана трет најголем увозник на оружје во светот во 2023 година, според новата студија на Стокхолмскиот меѓународен институт за истражување на мирот (СИПРИ). Од 1991 година до крајот на 2021 година, Украина увезла мал број тешко оружје, а во претходните пет години, Украина сочинувала два отсто од увозот на оружје во светот, додава СИПРИ.
Според „Киев Индепендент“, увозот на оружје во Европа се зголемил за 47 отсто меѓу 2013 и 2022 година „поради тензиите меѓу Русија и повеќето земји од ЕУ“.
СИПРИ додаде дека уделот на извозот на оружје од САД се зголемил од 33 на 40 отсто на глобално ниво, додека рускиот извоз паднал од 22 на 16 отсто.
Вицепремиерката на Украина и министерка за реинтеграција на привремено окупираните територии Ирина Верешчук денеска изјави дека во Бахмут може да останат уште околу 1.000 возрасни лица.
„Можеби во градот има 1.000 возрасни лица, но не знаеме каква е ситуацијата со децата“, рече таа во интервју за шпанскиот весник „Ел Паис“, пренесе ТАСС.
Според неа, Киев ја цени помошта на Западот, но потребно е повеќе оружје и муниција.
„Помалку сум загрижена за бројот на војници, повеќе сум загрижена за потребата од повеќе оружје“, додаде таа.
Група руски сопруги и мајки го повикаа рускиот претседател Владимир Путин да престане да ги испраќа нивните сопруги и синови „на колење“ со тоа што ќе ги принуди да се приклучат на тимовите за напад без соодветна обука или опрема.
Во видеото објавено на независниот руски телеграмски канал СОТА, жените рекоа дека нивните најблиски биле принудени да „се приклучат на напаѓачките групи“ на почетокот на март, иако биле на обука само четири дена откако биле мобилизирани во септември, објави Си-Ен-Ен. – Ен.