Француската полиција уапси еден од водачите на баскијското сепаратистичко движење ЕТА, по кој се трага од 2010 година.
Хуан Марија Мухика се сомничи за планирање на ракетниот напад на тогашниот шпански премиер Хозе Марија Азнар во 2001 година.
Мухика е уапсен во близина на градот По во југозападна Франција во заедничка акција на француската и на шпанската полиција. Не бил вооружен и не пружал отпор.
За Мухика беше распишана меѓународна потерница во 2010 година, поради членство во организацијата ЕТА и илегално поседување оружје и експлозив за вршење кривични дела.
ЕТА минатата година објави конечен крај на своите оружени активности кои беа со цел на создавање независна баскиска држава, но не прифати да се разоружа и распушти. За 4 децении постоење, ЕТА е одговорна за повеќе од 800 убиства.