Британецот Дојл Болинџер (57) кој работи како болничар е уапсен во својот дом во Кантербери, во југоисточна Англија, под сомнение за учество во канибалски заговор.
Полицијата цели 15 часови го испрашуваше Болинџер, а изврши и детален претрес на неговата куќа, трагајќи по докази и во градината настојувајќи да најде закопани трупови.
Тој тврди дека е невин и дека ништо лошо нема направено, но болницата во која работи го суспендира откако беше осомничен од полицијата и кога во станот беа откриени фотографии со насилство врз деца.
Апсењето на овој Британец е поврзано со процесот што се води во Њујорк против американскиот полицаец Џилберто Вали, обвинет дека изел две жени.
Вали бил редовен посетител на Интернет страницата за сексуален фетишизам и за сексуално насилство и на неа често комуницирал со Британец кој се регистрирал на страницата како „Муди Блуз“.
Со британскиот истомисленик Вали разменувал мислење за киднапирање, силување, тортура и канибализам врз жени. Британскиот соговорник во една прилика се пофалил дека има изедено две жени, едната црна, а другата бела и му давал совети на Американецот како да го приготвува месото. Полицијата во Кантербери сега се сомнева дека соговорникот на Вали можеби е болничарот Болинџер.