Турскиот претседател Таип Ердоган денеска изјави дека Турција ќе го започне процесот на ратификација на кандидатурата на Финска за членство во НАТО во парламентот, откако Хелсинки презеде конкретни чекори за исполнување на своите ветувања. На прес-конференција со неговиот фински колега, Ердоган рече дека Турција ќе ги продолжи разговорите со Шведска, уште еден кандидат за НАТО, за прашањата за тероризмот и дека нејзиниот прием директно ќе зависи од преземените мерки.
Финскиот претседател Саули Ниинисто го поздрави планот на Турција, велејќи дека тој е „секако, за цела Финска, многу важен“. Парламентите на 30 земји членки треба да ги ратификуваат барањата на новите земји за влез во НАТО. „Одлучивме да го започнеме процесот на ратификација на пристапот на Финска во НАТО во нашиот парламент“, рече Ердоган, додавајќи дека се надева дека парламентот ќе го одобри барањето на Финска пред изборите на 14 мај.
Како одговор на руската инвазија на Украина, Шведска и Финска се пријавија за влез во НАТО минатата година, но се соочија со неочекувани приговори од Турција. Анкара вели дека Стокхолм е рај за членовите на терористичките групи, што Шведска го негира.
Досега само Унгарија и Турција го немаат ратификувано финското и шведското барање за влез во НАТО. Унгарската владејачка партија Фидес во петокот објави дека парламентот ќе гласа за барањето на Финска на 27 март и дека ќе го поддржи барањето, додека апликацијата на Шведска е оставена за подоцнежен датум.