Американскиот претседател Доналд Трамп изјави дека воената акција против Иран е неопходна за да се спречи нуклеарен конфликт што би можел да ескалира во Трета светска војна.
„Доколку не бевме започнале воена акција против Иран, ќе имаше нуклеарна војна што ќе ескалираше во Трета светска војна“, рече Трамп, според Би-Би-Си.
Претседателот на САД повторно го критикуваше нуклеарниот договор со Иран, велејќи дека неговата одлука да го раскине го спречила Техеран да развие нуклеарно оружје.
Трамп додаде дека американските сили му нанеле „голема штета“ на Иран за само две недели операции.
„Она што го направивме беше во интерес на целиот свет“, рече тој.
На прашањето дали војната може да заврши до крајот на неделата, со оглед на тоа што рекол дека иранската војска е „уништена“, Трамп одговори потврдно, а потоа прецизираше дека всушност тоа ќе биде „наскоро“.