Американскиот претседател Доналд Трамп денес повтори дека САД ги уништиле нуклеарните постројки на Иран и предупреди дека ќе го сторат тоа повторно доколку е потребно.
Тој го цитираше министерот за надворешни работи Абас Аракчи, кој потврди во интервју за „Фокс њуз“ во понеделникот дека нападот предизвикал значителна штета и дека нуклеарните постројки биле уништени.
„Секако дека го сторија тоа, како што реков, и ние ќе го сториме тоа повторно доколку е потребно! Лажната мрежа на Си-Ен-Ен треба брзо да го отпушти својот лажен новинар и да ми се извини мене и на одличните пилоти кои ги уништија нуклеарните постројки на Иран. Си-Ен-Ен е голем губитник во рејтингот, како и MSDNC“, напиша Трамп на својата платформа Truth Social.
Си-Ен-Ен објави на почетокот на јули дека, врз основа на првичната проценка на Агенцијата за одбранбено разузнавање на САД, воздушните напади врз три ирански нуклеарни постројки не ја уништиле основната нуклеарна инфраструктура на земјата и дека во најдобар случај успеале да ги одложат нуклеарните програми за неколку месеци.