Американскиот претседател Доналд Трамп го повика претседателот на Федералните резерви, Џером Пауел, да ги намали каматните стапки.
– Ова би бил совршен момент за претседателот на ФЕД, Џером Пауел, да ги намали каматните стапки. Тој секогаш „доцни“, но сега може да го промени својот имиџ и тоа брзо, рече Трамп во објавата на неговата социјална мрежа „Вистина“.
„Цените на енергијата се намалени, каматите се намалени, инфлацијата е намалена, дури и јајцата се намалени за 69 отсто, а работните места се зголемуваат, сето тоа во рок од два месеци. Голема победа за Америка. Намалете ги каматните стапки Џером и престанете да играте политика“, рече Трамп.
CNBC објави дека новата трговска политика на американскиот претседател може да биде пречка што ја спречува Федералните резерви да ги намали каматните стапки.
Новите царини би можеле да доведат до широко распространето зголемување на цените, макар и привремено, што дополнително го отежнува движењето на инфлацијата.
Пауел денеска предупреди дека Американците наскоро би можеле да забележат зголемување на инфлацијата и невработеноста откако Трамп воведе реципрочни царини за повеќе земји.
Тој рече дека економијата е „сè уште стабилна“, но, како што рече, тарифите на Трамп може да предизвикаат „потрајни“ ефекти, како што се повисоки стапки на невработеност.
„Иако неизвесноста е сè уште висока, сега е јасно дека зголемувањето на царините ќе биде значително поголемо од очекуваното. Истото најверојатно ќе важи и за економските ефекти, кои ќе вклучуваат повисока инфлација и побавен раст“, рече претседателот на ФЕД.
Тој рече дека „обврска“ на ФЕД е да се погрижи „еднократното зголемување на нивото на цените да не стане тековен проблем“, предупредувајќи дека инфлацијата може да се зголеми „во наредните квартали“.