Британската премиерка Тереза Меј ја отфрли можноста за организирање на нов референдум за независност на Шкотска, откако анкетите покажуваат дека расте поддршката за отцепување.
„Не верувам дека е неопходно одржување на втор референдум. Веќе имавме еден со јасни резултати кои сите ги прифатија“ изјави британската премиерка.
На референдумот за независност на Шкотска во 2014. година, Шкотите изгласаа да останат во Велика Британија, но после референдумот за излегување на Британија од Европската Унија, расположението во земјата се менува.
Медиумите во Шкотска денес известија дека постои можност за организирање на нов референдум во август 2018. година.
Според последните анкети, 49 отсто од граѓаните на Шкотска се за независност, додека против се 51 отсто. Во истражувањето се додава дека поддршката за независност пораснала за три отсто во однос на претходната анкета спроведена во декември 2016. година.
Кралството Шкотска била независна држава до 1. мај 1707. година, кога со указ за обединување влегла во заедница со Англија.