Нова страница во италијанската медицина е напишана во Универзитетската болница „Папа Џовани XXIII“ во Бергамо (Италија).
За првпат во таа земја е извршена истовремена трансплантација на бубрег и дел од црниот дроб, а донорот е татко, 37-годишен државјанин на Србија, кој на тој начин го спаси животот на својата седумгодишна ќерка Софија.
Постапката е извршена на 18 декември, траеше полни 18 часа, а и таткото и детето се пуштени вчера на домашно лекување, по успешното закрепнување.
Со години, Софија се бореше со исклучително ретка генетска болест која истовремено ги оштетува црниот дроб и бубрезите. Од четиригодишна возраст, таа беше на дијализа од 13 до 18 часа на ден дома, додека хемодијализата, која мораше да ја прима секој втор ден, дополнително ја исцрпуваше.
Во меѓувреме, се разви цироза на црниот дроб, што целосно ја исклучи можноста за класична, индивидуална трансплантација на бубрег.
Лекарите објаснуваат дека кај вакви пациенти, органот што е во потешка состојба обично се трансплантира прво, додека втората процедура се изведува подоцна, во посебна операција.
Сепак, во случајот на Софија, и црниот дроб и бубрезите беа критично загрозени, па затоа беше одлучено да се трансплантираат двата органи истовремено. Овој пристап донесе повеќекратни придобивки – девојчето избегна продолжена дијализа по трансплантацијата на црниот дроб, додека таткото беше поштеден од уште една операција и повторена општа анестезија.
Пред да се донесе конечната одлука, беше спроведен исклучително сложен и строг процес на евалуација. По медицинските проценки за соодветноста на донорот, беше добиена согласност од Третата регионална комисија, а потоа и официјално одобрение од Обвинителството во Бергамо.
Мултидисциплинарен тим од експерти од областа на абдоминалната хирургија, хепатологијата и нефрологијата ја потврди целосната компатибилност на таткото и ќерката, со заклучок дека ризиците за донорот се прифатливи во однос на потенцијалната корист за детето.
Таткото рече дека тој и неговата сопруга ја донеле одлуката пред повеќе од две години, кога нивната ќерка морала да оди на дијализа за првпат.
– Му се молевме на Бога за помош и тој нè слушна. Наше беше само да направиме она што би го направил секој родител – рече тој.
Денес, како што вели, нивната ќерка води сосема поинаков живот.
– Најдобро е да се види дека нејзиниот апетит и желба за игра се вратиле. Порано, таа брзо се заморуваше и мораше да престане да игра за да легне да се одмори. Сега е повторно жива, радосна и полна со енергија, без катетрите што ѝ беа потребни со години поради дијализа. Конечно може да оди на училиште и да живее безгрижно како нејзините врсници – велат родителите.
Истовремена трансплантација на бубрег и црн дроб кај дете никогаш не е извршена во Италија, а само неколку слични случаи во други европски земји се евидентирани во стручната литература. За време на подготовките за постапката, Софија долго време беше хоспитализирана на педијатриското одделение на чело со професор Лоренцо Д’Антига, каде што продолжи со дијализа под постојан надзор на нефролог.
Здравствената состојба на таткото беше оценета на Одделот за гастроентерологија, хепатологија и трансплантологија, на чело со Стефано Фајуголи, како и на Одделот за нефрологија под водство на Пјерлуиџи Ругендренти, во соработка со Центарот за бубрежна трансплантација на чело со Ана Рита Плати.