Светската здравствена организација потврди шест случаи на хантавирус поврзани со крстаречкиот брод кој плови кон Шпанија, додека здравствените власти ширум светот спроведуваат интензивно следење и епидемиолошки анализи. Според последните информации, вкупно осум лица се заразени, а три лица починале.
Станува збор за бродот „MV Hondius“, кој плови од Јужна Америка кон Канарските Острови. СЗО соопшти дека шест од случаите лабораториски се потврдени како Andes вирус – редок вид на хантавирус кој во одредени ситуации може да се пренесува и меѓу луѓе.
Властите во повеќе држави веќе започнаа со следење на патниците кои се симнале од бродот пред официјално да биде потврдено присуството на вирусот. Според извештаите, дел од патниците се вратиле во Велика Британија, САД, Швајцарија, Австралија и други земји, по што започна глобална координација за нивно лоцирање и медицински надзор.
Светската здравствена организација нагласува дека ситуацијата е сериозна, но дека засега не постои ризик од пандемија слична на ковид-19. Од организацијата објаснуваат дека овој вирус не се шири лесно и дека за пренос е потребен близок и подолг контакт со заразено лице.
Хантавирусот најчесто се пренесува преку контакт со измет, плунка или урина од заразени глодари, а симптомите може да вклучуваат треска, замор, болки во мускулите и сериозни респираторни проблеми. Во потешки случаи може да дојде до воспаление на белите дробови и респираторен колапс.
Европскиот центар за превенција и контрола на болести соопшти дека продолжува истрагата за тоа дали вирусот се проширил на самиот брод или дел од патниците биле заразени уште пред патувањето.