Британскиот премиер Кир Стармер денес изјави дека конфликтот со Иран не е војна на Обединетото Кралство и дека Лондон нема да биде вовлечен во него, нагласувајќи дека секоја можна акција мора да има правна основа и јасно развиен план.
„Ова не е наша војна и ние нема да бидеме вовлечени во неа“, рече Стармер.
Зборувајќи пред Комитетот за врски на британскиот парламент, Стармер рече дека Обединетото Кралство не се придружило на почетните офанзивни напади токму поради потребата секоја воена одлука да биде заснована на меѓународното право и внимателно испланирана, објави Скај њуз.
„Мора да постои правна основа за секоја акција и одржлив, осмислен план. Затоа не учествувавме во првичните напади“, рече Стармер.
Тој рече дека Лондон наместо тоа презел мерки во колективна самоодбрана, заедно со сојузниците во регионот, вклучително и соборување на ракети што доаѓаат од Иран.
Британскиот премиер додаде дека Велика Британија им дозволила на Соединетите Држави да ги користат своите бази за операции против иранската ракетна инфраструктура, исто така како дел од колективната одбрана.
Британската влада го одобри користењето на своите американски бази за извршување напади врз ирански локации во Ормутскиот теснец на 20 март.
Даунинг стрит претходно им дозволи на американските сили да ги користат британските бази за операции за да се спречи Иран да лансира ракети што би ги загрозиле британските интереси или животи.
Сепак, министрите се согласија на состанокот на 20 март дека употребата на британски бази од страна на САД сега може да се прошири за заштита на превозот во Ормутскиот теснец, објави Би-Би-Си.
Британската влада изјави дека сè уште нема да биде директно вклучена во нападите и дека „принципите зад британскиот пристап кон конфликтот остануваат исти“.