Со објавување на добитникот на Нобеловата награда за економија заврши сезоната за доделување на оваа престижна награда, која свечено ќе биде врачена на 10-ти декември во Осло и Стокхолм.
Ова е списокот на добитниците
Нобеловата награда за мир им припадна на 17-годишната Пакистанка, Малала Јусафзаи и Каилаш Сатиарти од Индија, поради нивната борба против репресија над деца и млади и правото за образование на сите деца.
Наградата за книжевност ја доби Патрик Модиано од Франција чии романи зборуваат за нацистичка окупација и последиците од тој период.
Добитник на наградата за економија е Жан Тирол, исто така од Франција.
Нобеловата награда за медицина ја добија американско-британскиот научник Џон О’Киф и норвешкиот брачен пар Меј Брит и Едвард Мосер, за откривање на клетки на системот за просторна ориентација во мозокот, кои овозможуваат движење.
Годинава добитници на престижната награда за хемија се американските научници Ерик Бециг и Вилијам Мемер и Германецот Штефан Хел за развојот на флуоресцентната микроскопија или наноскопија.
Нобеловата награда за физика им припадна на јапонските научици Исаму Акасаки, Хироши Амано и Суџи Накамура поради достигнувања во технологијата за осветлување и пронаоѓање на таканаречените ЛЕД светилки.
-Научниците се наградени поради пронаоѓање на нов енергетски ефикасен и еколошки извор на светлина- се наведува во соопштението.
Е. Г.