Британскиот природонаучник Дејвид Атенборо, Светската здравствена организација и белоруската дисидентка Светлана Тихановскаја се меѓу номинираните за овогодинешната Нобелова награда за мир, откако добија поддршка од норвешките пратеници.
Илјадници луѓе имаат право да номинираат кандидати, од пратеници до поранешни победници.
Кандидатите номинирани од норвешките пратеници победуваат секоја година од 2014 година, со исклучок на 2019 година. Минатата година, една од победниците беше Марија Реса, филипинска новинарка која беше и нивен кандидат.
Норвешкиот Нобелов комитет, кој одлучува за конечниот добитник, не ги коментира номинациите и веќе 50 години не ги открива имињата на кандидатите и оние кои ги номинирале. Но, понекогаш норвешките пратеници ги откриваат своите номинации.
Дејвид Атенборо е 95-годишен британски природонаучник, познат по неговите документарни филмови за природниот свет. Кон крајот на минатата година, неговиот говор на конференцијата за климатски промени COP26 во Глазгов одекна и тој е номиниран заедно со Меѓувладината научно-политичка платформа за биодиверзитет и услуги на системот (IPBES).
Номинирани се за нивната работа на „информирање и заштита на природната разновидност на Земјата, неопходна за одржливи и мирни општества“, рече лидерката на норвешката Зелена партија, Уна Бастолм.
Еколози ја добивале Нобеловата награда во минатото, како што се кенискиот активист Вангари Маатаи или поранешниот потпретседател на САД Ал Гор.
Во годината во која светот беше преобликуван од пандемијата на коронавирус, повторно беше номинирана Светската здравствена организација.
Втор пат по ред е номинирана лидерката на белоруската опозиција во егзил, Свјетлана Тихановскаја. Таа е кандидат поради нејзината „храбра, неуморна и мирољубива работа“ за демократија и слободата во својата земја, изјави конзервативниот парламентарец Харек Елвенес.
Други кандидати откриени од пратениците се рускиот активист Алексеј Навални, Меѓународниот кривичен суд во Хаг, Викиликс и Челзи Менинг и НАТО.
Победникот за 2021 година ќе биде објавен во октомври оваа година.
Извор: МИА