Во анкетата на словачкиот весник „Ново време“, во која се гласаше за „најглупава јавна личност во Словачка“, убедлива предност со над 36 проценти гласови добил претседателот Иван Гашпарович, пренесоа чешките медиуми.
Минатата година Гашпарович направи неколку лапсуси, кои очигледно му го донесоа приматот во анкетата, јави дописникот на МИА од Прага.
Во една прилика тој изјави: „За едно од најважните прашања за стабилизација на регионот на Западниот балкон…ехм…Балкан.“ или пак „Ќе ви одговорам со два збора – да, имате право“.
Потсмев во јавноста предизвикаа и неговите збунувачки формулации „Организација на обединетите тумори“ наместо Обединети нации, како и кога познатата фраза „црно на бело“ тој ја изговори како „Го имате тоа бело на црно“.
– Јас речиси 400 денови поминав на пат низ Словачка, што е речиси цела една година, рече во една прилика словачкиот претседател и јавноста му забележа уште еден лапсус.