Училиштата и судовите ширум Словачка денеска добија извештаи за поставени бомби и мини, објавија словачките власти.
Училиштата добиле заканувачки мејл во кој се наведува дека во нивните простории биле поставени нагазни мини, пренесува ТАСР.
Закани за бомби се испратени до судовите низ земјата, изјави денеска за словачката агенција портпаролката на регионалната полиција во Нитра, Јана Шинкова.
Заканите биле упатени со јавување на итниот број 112, а полицијата веднаш започнала истрага.
На загрозените локации се распоредени патроли, експерти за експлозиви и кучиња трагачи.
Полицијата на Фејсбук соопшти дека ги презема сите неопходни мерки, додавајќи дека е во близок контакт со други безбедносни сили и странски партнери, меѓу кои и чешката полиција.
-Нашата заедничка цел е пред се безбедноста на децата во училиштата, но и најмало можно нарушување на наставниот тек. Затоа имаме индивидуален пристап кон безбедносните мерки во секое училиште, се наведува во соопштението.
Во расветлувањето на овој случај, кој се третира како терористички напад, вклучена е и полициската служба за борба против организираниот криминал.
Околу 270 основни училишта низ Словачка вчера добија дојава за бомба.
Полицијата не пронашла експлозив во училишните простории, па учениците по проверка можеле да се вратат во училниците.