Британската полиција во Лондон и во областа Чешајар, во близината на британскиот главен град, денеска уапси шестмина новинари на згаснатиот неделник „Њуз оф д Ворлд“, под сомнеж дека прислушувале мобилни телефони со цел да дојдат до ексклузивни вести.
Скотланд Јард соопшти дека станува збир за тројца мажи и три жени, но не го соопшти нивниот идентитет, освен дека сите се на возраст меѓу 39 и 40 години.
Во полициското соопштение се посочува дека нивните случаи се дополнителни утврдени во истрагата што почна во јули 2011 година, по ескалацијата на аферата со ловењето на говорната пошта од мобилните телефони. Сите прислушувања се извршени во периодот меѓу 2005 и 2006 година.
Најтиражниот британски неделник „Њјуз оф д Ворлд“ беше затворен во јули 2011 година, со одлука на компанијата „Њуз Интернешенел“, која го издаваше. Весникот и оваа британска новинска компанија се дел од глобалната медиумска империја на Руперт Мардок.
Во полициската истрага за прислушувањето, досега се уапсени 32 новинари, што е далеку најголемиот број на уапсени во Европа. За 15 од нив полицијата имаше докази за да бидат и формално обвинети.