Украинскиот министер за надворешни работи Андриј Сибиха денес изјави дека еден ден војна со Русија ја чини Украина околу 450 милиони долари, нагласувајќи дека најтешката цена што ја плаќа земјата е загубата на животите на украинските војници.
Зборувајќи на конференцијата „Стратешка арка“ организирана од Полскиот институт за меѓународни односи (PISM), Сибиха рече дека Украина е „многу блиску до моментот кога времето би можело да почне да работи во нејзина корист“, објави УНИАН.
Според него, руската економија покажува знаци на ранливост, додека поддршката за рускиот претседател Владимир Путин во Русија, тврди тој, „опаѓа“.
„Гледаме дека нешто се случува таму. Имаме наши разузнавачки податоци и проценки за нашите партнери“, рече Сибиха, додавајќи дека Украина сака да го зголеми притисокот врз Русија со различни средства за да се стави крај на војната.
Украинскиот министер оцени дека тековната година може да биде клучна за постигнување мир, но нагласи дека Украина сè уште трпи огромни финансиски и човечки загуби, пренесува Танјуг.
„Највисоката цена е крвта на украинските војници“, рече Сибиха.
Изјавите на Сибиха дојдоа откако Институтот за проучување на војната процени дека во моментов нема индикации дека Русија планира наскоро да ја заврши војната, и покрај претходните сигнали од Москва за можен крај на конфликтот.